Батыл бетбұрыстар бастамасы

Иә, Мемлекет басшысы Қасым-Жомарт ТОҚАЕВТЫҢ Қазақстан халқына арнаған жаңа Жолдауын батыл бетбұрыстар бастамасы деп бағамдауға толыққанды негіз бар. Бұл бастамалар – тарихи реформаларды өз басынан өткеру кезеңінде тұрған елдің тәуекелшіл қадамдарға ниет қойғанының дау тудырмас айғағы.

Бүгінгі әлем саяси шиеленіске толы екені белгілі. Осы тұрғыдан алғанда, жаңа Жолдау алуан сипатты қауіп-қатерге қарсы тұру әрекеттерін айқындауымен ерекшеленеді. Әділетті Қазақстан құру тәсілдерін «жіліктей» талдап берген Президент Жолдауында елдің экономикалық мүмкіндіктеріне айрықша назар аударылып, қимыл-қарекеттер бағдары нақтыланды.

Ұлттық қор түсімінің 50 процентін 2024 жылдан бастап 18 жасқа толмағандардың есепшотына аудару талабы, әйелдердің зейнет демалысына 61 жастан шығуы – әлеуметтік әділеттіліктің үстемдік құратынының көрінісі.

Сот жүйесі мен құқық қорғау, ауылшаруашылығы және өзге де салаларда жүргізілетін тың реформалар Қазақстанның өркендеу бағытындағы дара даңғылы болмақшы.

Мемлекет басшысының өкілеттілігін 7 жылға ұзартып, қайта сайлануына шектеу қою бастамасын билікті монополиялау үрдісін ретке келтіру тетігі деп бағамдау керек. Президент сайлауын, Парламент Мәжілісі мен мәслихаттар сайлауын мерзімінен бұрын өткізу жөніндегі ұсынысы – бұқара қауым күткен саяси реформалардың бастапқы қадамы.

Жаңғыру жолына түсудің оңтайлы тәсілдерін көрсетіп берген Жолдау мемлекеттік құрылымдарға ғана емес, әр саналы азаматқа салмақты жауапкершілік жүктері анық.

Қасым-Жомарт Кемелұлы осыншалықты ауқымды міндеттерді ұлттық деңгейдегі жауапкершілік санай отырып, өз басы үшін Отанның дамуы мен игілігінен асқан құндылық жоқ екенін айрықша атап айтты. Бұл – үлгі тұтар ұстаным.

Жаңғыру мен жаңаруды мақсат тұтқан Қазақстанның қапысыз кемелденуі – қалың елдің тілегі. Ендеше барша қауым болып ымыра-бірлікке ден қою, келер күндердің жарқын болуы жолында тынымсыз тірлік ету әркімнің бұлжымас мақсаты болуы тиіс. Асыл мұраттарға сонда ғана жетеріміз күмәнсіз.

Ахат ҚҰРМАНСЕЙІТОВ,

ақпарат саласының үздігі